Güei xueves, a las 20,00, manifestámonos en Llión polas trabayadoras de VESTAS

06/09/2018

manifestacion vestas

Ante la decisión de la empresa Vestas de pechar la sua planta de producción en Villadangos del Páramu, la Iniciativa Ciudadana Xuntanza quier manifestar:

– El nuesu compromiso na defensa de los puestos de trabayu directos y indirectos de las trabayadoras y los trabayadores.

– El nuesu refugu a las políticas de deslocalización de las empresas, que deixan un fondu furacu social na provincia de Llión, a costa de precarizar aínda más las condiciones del trabayu en países en vías de desenvolvimientu, lo que supón un proveitu evidente de las lóxicas del capitalismu.

– Oponémonos tamién a que Vestas proponga una recolocación de compañeras y compañeiros n’outros territorios del estáu ou inclusive n’Arxentina. Queremos un trabayu de calidá que nos permita asitianos no nuesu territoriu.

– Recordamos a las Adminmistraciones la sua falta de compromisu na defensa de los puestos de trabayu y nos intereses de la sociedá llionesa. Gobiernu Autonómicu y Central miran pa outru llau, siendo actores principales nesti sainete. Ye preciso recordar la sua actitú cuando foron amenazadas outras empresas y sectores dientro de la Comunidá Autónoma (Gullón, Lauki, FASA) ou cuando’l Parque Tecnólóxicu de Boecillo afalaba a las empresas llionesas pa trasladase a las suas instalaciones.

Nesi sen, no País Llionés vemos cumo se replica de contino’l mesmu dibuxu, cono fomentu económicu del eixe Valladolid – Palencia – Burgos, en perxuiciu del nuesu texidu industrial. Ye necesario encalcar el problema de fondu, que nun ye outru que la falta de soberanía na toma de decisiones y la propia existencia de la Comunidá Autónoma de Castiella y Llión, dalgo evitao davezu polos partidos mayoritarios y tamién polas fuercias d’esquierda, afanadas en caltener vivu un desaciertu que llevóu a la ruina a las tres provincias llionesas.

Ye por ello que convocamos a la ciudadanía llionesa a manifestase esta tarde a partir de las 20,00 horas dende la Gran Vía de San Marcos de la ciudá de Llión, pola defensa de los puestos de trabayu y la dignidá de trabayadoras y trabayadores.

FACEBOOK