MANIFIESTU 20N

19/11/2017

concentracion antifascista llion

Un 20 de noviembre más, llioneses y llionesas volvemos a salir a la calle pa dexar craro que nas nuesas calles nun hai espaciu pal fascismu nin pal nazismu.

Tenemos craro que’l fascismu ye la fuercia de choque qu’utiliza’l capitalismu cuando esti vei peligrar los sous privilexos. La fuercia a la que los grandes monopolios y los sectores económicos recurren cuando’l restu de mididas más disimuladas d’esplotación fallan y la crase obrera escomencipia a coyer conciencia de la inutilidá, pa la nuesa crase, d’un sistema socioeconómicu que nos condelga a la miseria.

Anguaño cremos que la lluita escontra’l fascismu ye más importante que nunca. Estamos nuna dómina au los medios de comunicación del capital nun paran de llavar la cara al fascismu, tanto mazcarando la verdadera ideoloxía, racista y xenófoba, de los desemeyaos grupos qu’están a manifestase conos aperios de la “unidá d’España”, cumo de las mididas qu’están garrando los partidos qu’administran l’Estáu, normalizando la represión y lexitimando diferentes violencias escontra’l puebru.

Dende eiquí queremos dexar craro que la solidaridá conos trabayadores y trabayadoras del restu del Estáu tien que ser una de las principales características del puebru llionés. Por todo ello, trabayamos y trabayaremos en consiguir esterredar el fascismu de las nuesas calles y de la nuesa sociedá, cona nuesa crase obrera cumo subxectu principal nesta xera.

Tampouco nun podemos trescordar esti añu, Centenariu de la Revolución d’Outubre que llevóu a la crase obrera rusa a garrar el poder y derrotar el fascismu y fincóu las bases d’una sociedá que nun diou p’atrás na lluita escontra las fuercias de choque del capitalismu.

Esti 20N tien que ser una piedra más no Camín del Réxime del 78. Una fecha que permita organizanos alredor d’unas reivindicaciones y una meyora de condiciones que nun caben baixo los acuerdos de la Transición. Un 20N que siñale’l fascismu d’anguaño y que tamién sirva pa siñalar lo que llevamos arrastras dende’l 78. Por ello, tenemos que dexar craro que la lluita escontra’l fascismu ye tamién una lluita escontra las instituciones heredadas del franquismu.

Numás el trabayu acomuñáu pol conxuntu de la nuesa crase obrera puede trayer una sociedá digna pa las trabayadores y los trabayadores.

ESCONTRA’L FASCISMU… ¡NIN UN PASU ATRÁS!

FACEBOOK