Activando al Puebru llionés. conclusiones del I Conceyu de la Esquierda Llionesa.

08/11/2017

Activando al puebru llionés. Conclusiones del I Conceyu de la Esquierda Llionesa.

Documentu en formatu PDF: en llionés | en galego | en castellano.

Los cambios políticos nas postreras décadas, la puxanza del liberalismu económicu, los procesos de globalización, la preponderancia del nacionalismu español y l’amenaza de nuevos trataos comerciales están configurando realidades sociales y escenarios políticos desemeyaos. Nesi sen, la Esquierda Llionesa afronta una situación novedosa, col arcu políticu atomizáu y la capacidá de decisión de la sociedá llionesa menguada, desfeita ou directamente substraída.

La continuidá del Réxime del 78 en tódalas suas formas, incluída l’autonomía de Castiella y Llión, y el respaldu de los partidos políticos (los sucursalistas y los llioneses), torgoron el desenvolvimientu de la sociedá llionesa, samargullada nuna crisis de carácter estructural que vai acullá de lo meramente económicu, pa fundir las suas reíces na nuesa propia identidá cumo Puebru.

Nuna escala más global, dende un pensamiento decolonial, ye tamién necesario abordar tódolos eixes d’opresión que nos asitian no marcu de lo subalterno. El patriarcáu, el desarrollismu, las discriminaciones por rezones de raza, llengua, etc. Todo ello fincao a favor de lo hexemónico, golpeando con diferentes intensidades, pero siempre de xeitu transversal a la nuesa sociedá.
Por ello, entendemos axeitada la creación d’espacios d’alcuentru au poder debatir estas problemáticas y aportar soluciones propias dende’l marcu d’una esquierda que vea necesario articular a la sociedá llionesa cumo subxectu políticu, superando las artificiales y impuestas llendes administrativas, feitu que nos llevóu a convocar a diversas organizaciones, entidades, partidos políticos, plataformas y ciudadanía en xeneral, al I Conceyu de la Esquierda Llionesa, que se celebróu nel Ateneo Varillas de la ciudá de Llión, durante los días 14 y 15 d’outubre de 2017.

L’acabación del Réxime del 78 ye una realidá que tien cumo principal puntu de partida l’empiezu d’un Procesu Constituyente que se vei reflexáu na realidá política d’anguaño conos feitos qu’estamos a vivir en Catalunya.

Entre las propuestas de diversos partidos políticos con representación directa a nivel estatal, escomencipia a garrar forma, cumo posible alternativa al rabileiru momentu presente, una reforma constitucional na que podría caber la conversión del Estáu de las Autonomías nun Estáu Federal; un feitu ante’l cualu las llionesas nun podemos quedar impasibles, sinon que debemos ser un subxectu activu na posible transformación que chega.

Durante llargos años, la reclamación del aumentu de cuotas d’autogobiernu pola parte de la sociedá llionesa vieuse probemente reflexada nuna simple y tebia reclamación autonomista, sobro la cuala’l teitu de cristal del españolismu siempres primóu ante los intereses del nuesu Puebru y del restu de naciones del Estáu. La respuesta a esta reclamación siempres foi que’l mapa autonómicu estaba pecháu, no qu’estamos d’acuerdu. L’Estáu español y los filos del tardofranquismu que lu dirixen, están mui bien tal y cumo están, pueis asina lo reflexa’l sou inmovilismu. Nun tienen la más mínima intención de mudar nada, por ello, el debate autonomista ye dalgo que debemos esterredar del nuesu discursu, entendiendo que la única posibilidá de la sociedá llionesa pa recuperar l’autogobiernu que-ye correspuende, ye la movilización y implicación na gran oportunidá d’esti debate abiertu. La pergunta ye ¿volveremos dexar pasar de llargu ante los nuesos güeyos outra oportunidá?

La Esquierda Llionesa, aconceyada alredor de diversos colectivos, trabayóu dende va diez años col obxectivu de crear un referente propiu nel espaciu políticu llionés, por mor del vacíu dientro de las esquierdas convencionales, las cualas disfrutaban de la comodidá que supón una militancia que nun cuestionaba a xeitu las estructuras antidemocráticas herederas d’una transición que, a efectos reales, supuxo más bien una transacción, consagrada na máxima “atao y bien atao”.

Ante los feitos sucecidos nos últimos años, de cambiu substancial y de crisis total de las estructuras estatales, la Esquierda Llionesa, tres la celebración del sou I Conceyu (nacidu con vocación de continuidá) decidíu reaccionar con rixu, implicase activamente na situación histórica na que nos alcontramos y empuntiar tódolos sous esfuercios nun mesmu sen, pa ufiertar a la sociedá llionesa’l referente políticu que nunca nun tuvo y que, a tódolos efectos, precisa. Por ello, rematáu esti I Conceyu, queremos trasladar a la ciudadanía del País Llionés los principales compromisos y conclusiones a los que cheguemos tres el fondu debate entamáu durante dúas intensas xornadas nel Ateneo Varillas.

Pa coyer la iniciativa y nun quedar indiferentes ante la posible reforma de la Constitución Española, créase una Coordinadora Soberanista Llionesa p’aconceyar, dende’l veiru del autogobiernu llionés, a diversas soberanías que la mansa y tebia reivindicación chamada “llionesista” inorara, cumo pueden ser la soberanía alimentaria ou la soberanía sobro’l nuesu propiu cuerpu. Nesta Coordinadora, estarán incluidas tódalas organizaciones que compartan una visión soberanista pal puebru llionés, siendo un núcleu qu’actúe de voceiru pa espayar un discursu de mínimos unificáu dende la esquierda, ensin perxuiciu de que, pa ciertos temas puntuales, pueda haber cercanía con outros actores.

Al respective de la presencia de la Esquierda Llionesa en procesos electorales, abríuse (y acontina) un fondu debate, pueis nun podemos inorar la posibilidá y la necesidá que tien la sociedá llionesa de poder apostar por una opción política global elixible.

Del mesmu xeitu, la Esquierda Llionesa ha estar, y estará, na defensa de la tierra, na defensa del sistema de conceyos, na defensa de la crase obrera, na lluita escontra la despoblación, plenamente implicada no movimiento estudiantil, xunto a los productores locales, nos Conseyos de los nuesos barrios y ciudades y solidarizándose dafeitu cono restu de reivindicaciones soberanistas y de movimientos decoloniales del planeta.

Reconocemos la esistencia d’una opresión de xéneru nas nuesas organizaciones y, considerando que lluitamos por un mundu llibre d’opresiones, concordamos en que debemos atacar esi problema llevando a cabu un análisis permanente, individual y colectivu, localizando la naturalización de las conductas del patriarcáu. Consideramos que las nuesas organizaciones exercen esas conductas y, quienes las exercen, han arrenunciar a los sous privilexos, deconstruyendo’l rol masculinu hexemónicu. Compartimos la visión del feminismu comunitariu qu’axunta las lluitas de recuperación de la tierra y de los cuerpos frente a las violencias exercidas escontra los puebros y escontra las muyeres. Los espacios d’autonomía territorial son espacios de construcción popular, d’abaixo a arriba, especialmente fructíferos pa los distintos procesos d’emancipación. Por ello, la lluita feminista será un elementu transversal na nuesa militancia, pueis queremos construir un Puebru llionés llibre y feminista.

Todu’l conxuntu de llinias ideolóxicas y de trabayu, hasta eiquí detalladas, suponen la fueya de ruta pola que la militancia de la Esquierda Llionesa habrá guiase, pa devolver al Puebru llionés todos y cadagunu de los dereitos elementales que los intereses político-económicos d’estáu-ye arrampuñoron, gracias a la complicidá d’una crase política llionesa entregada a la sua propia medría.

Pa cabu, ante la situación irrepetible y histórica qu’está pasando ante los nuesos güeyos, queremos facer un chamamientu a todu’l Puebru llionés pa que nun se limite a contemplar las horas que chegan, pa que salga a la calle y participe, porque los inquisidores del siegru XXI, los que s’afanan en poner puertas al campu y al mar utilizando la sua legalidá pa esmagar procesos democráticos y llibertadores, nun podrán facer nada escontra un Puebru unidu, allegre, empoderáu y combativu.

faldon de colectivos del i conceyu de la esquierda llionesa

FACEBOOK